布力般冇料到難抗「迪」

布力般流浪今晚會喺英冠主場擺陣，迎戰卡迪夫城。布力般季前賽表現超好，但原來只係虛火，開鑼至今連盃賽3場竟未逢一勝。反觀卡迪夫城聯賽首兩仗雖則和波，但表現尚算唔錯，今場作客對住「鱷魚頭、老襯底」嘅布力般，開到齋都唔出奇，一於撐3.05倍客勝！（開賽時間：周三凌晨2:45）

卡城贏韌力 開齋在望
季前熱身賽係威係勢嘅布力般，除咗首場輸畀羅奇代爾1:2之外，其他4場錄得3勝1和，好似好有火咁。不過，佢哋未能將狀態帶入正式比賽，英冠開鑼戰主場1:2不敵狼隊之後，英聯盃對梳士貝利以同樣比數再輸多場，首圈出局認真羞家。上場重返英冠作客哈特斯菲爾德，晨咁早就落後1球，好在前鋒新兵迪爾科尼素射入加盟後首個入球，先至唔使連輸3場咁肉酸，以布力般依家嘅狀態，認真信唔過。

作客嘅卡迪夫城方面，陣中雖有前鋒馬捷達、守將端納同伊古利文加3名傷兵，但勝在韌力夠，英冠兩場都係喺落後嘅情況下追和。呢班波其實有一定嘅入波能力，連埋季前熱身8場錄得5勝3和兼入咗14球，只要改善到開波初段表現唔穩陣嘅問題，絕對有機會喺今場開齋，客W博得過！