歐聯附加賽「死亡對決」組合，必數拉素主場對利華古遜！兩軍交鋒意味意甲同德甲將有一隊無緣晉級分組賽，由於意甲仍未開鑼，拉素球員狀態不足，即使首回合有地利，亦難佔優勢。至於利華古遜已上晒力，平手盤值博。（有線64及203台周三凌晨2時45分直播）
拉素上季踢到最後一場聯賽，力壓拿玻里，取得歐聯席位。不過意甲要等到8月22號晚先至開鑼，拉素近期熱身賽，都係畀球員鬆筋骨同試陣，仍未重拾正式比賽心態，頻頻輸波，早前意超盃亦吞祖雲達斯兩蛋，近4場賽事只入1球，表現好Hea。
聯賽未開咧拉素勁hea
加上佢哋今季喺轉會巿場冇乜大動作，仍靠高路斯、菲臘安達臣、簡達華等主力搵食，好聽啲就係人腳變動少夾慣夾熟，實情係成班兵又大一歲，喺歐洲高水平賽場只有「不進則退」，故此即使今場係歐聯大戰，但以拉素目前境況，恐怕短期內谷唔起狀態，想贏都有心無力。
利華古遜已經過一場德國盃及一場德甲「熱身」，而且取得全勝，射手傑斯寧兩仗都有波入，腳風相當順。事實上，德甲近年水準已拋離意甲，整體歐聯成績亦較佳，以上屆為例，拜仁慕尼黑、多蒙特、史浩克04、利華古遜，都打入16強。反觀，意甲只靠祖雲達斯獨力支撐大局，其他意甲球隊無力喺歐聯立足，利華古遜今仗可反客為主。
