反勝畢爾包5球
今晚西班牙超級盃次回合，巴塞隆拿返魯營主場再鬥畢爾包，堂堂「地上最強」首回合作客狂吞4蛋，要反勝5球捧盃可以話係「Mission Impossible」，不過，巴塞好耐未試過遭受咁大嘅羞辱，勢必刺激起球王美斯等眾球星力圖反勝嘅鬥心，主場火力全開，起碼要贏番場冧番球迷，但撞正畢爾包「獅王」阿度里斯腳風順到冇朋友，鬥攻格局實多波入，就算中位數調至3.5球都照捧入球大。　(now 632周二凌晨4時直播)

防線穿窿尼馬續抖
巴塞先喺歐超盃踢到加時險勝西維爾5比4，日前再喺西超盃首回合以0比4慘敗畀畢爾包，兩場失8球防線穿晒大窿，「神經龍」達史特根學師兄紐亞出迎解圍而被米基聖荷西笠死堅(火羅)，堂堂「地上最強」慘遭奇恥大辱，反而激起眾將欲創造奇迹嘅決心，悍將馬斯真蘭奴表示佢哋唔會放棄，堅信巴塞能大逆轉反勝捧盃。

雖然尼馬繼續缺陣下要淨勝5球真係談何容易，但畢竟巴塞仲有球王美斯、蘇亞雷斯在陣，尤其係美斯一向唔衰得，由於正隊長恩尼斯達未知能否趕及披甲，呢位副隊長必定搏甩髀爭取士哥。

主帥硬頸沿用舊陣
不過，巴塞主帥安歷基非常硬頸，賽前表明會沿用首回合正選人腳再鬥畢爾包，即係話碧基繼續做後備，由冇態嘅華美倫搭住經驗一般嘅馬斯巴查鎮守中路，騰騰震嘅沙治羅拔圖就打中場，加埋右路缺口丹尼爾同「神經龍」達史特根，睇見呢條中後場都戥佢哋擔心。因為首回合畢爾包「獅王」阿度里斯連中三元，同馬高蘇沙亞達玩到「地上最強」防線氹氹轉，今仗巴塞冇得諗焗攻谷晒上前，隨時畀「巴斯克雄獅」狂打反擊，斯維唔敢講邊隊會贏，但肯定會勁多波入，中位數調至3.5球仍然照捧大盤。