札幌岡薩多10戰不勝，岡山綠雉亦7仗未贏過，呢兩支時下日乙最謝嘅球隊，今日响札幌Dome交手，打死都寧願博札幌1.88倍主勝，事關「水鬥水，博主隊」吖嘛！

坦白講，今日批日乙入面，大宮、櫻花嘅贏面都比較高，問題係賠率唔多吸引，揀咗札幌嚟玩，完全因為佢哋有前鋒拿沙列、中場小野伸二兩件猛人久休復出，往績又贏晒，對住場均入唔到1球嘅岡山，冇理由開唔到

W啫。

札幌成10場波都贏唔到，主要問題在於門前把握力弱，箇中關鍵係前鋒線傷兵太多，都倉賢有排未出得，拿沙列亦抖咗兩個幾月，靠內村圭宏一個衝鋒陷陣，同無頭一啤蛇冇乜分別，所以好多時候札幌都贏形勢失分，例如上場作客長崎成功丸，佢哋有成20次射門，多對手成4倍，居然1球不入，悶和0:0收場。

岡山往績勁輸蝕
今場形勢就唔同嘞，札幌終於等到哥倫比亞射手拿沙列復出，呢位前日25歲生日嘅前鋒，試過6場波省5球，係部相當有效率嘅射門機器，加埋小野伸二左邊大髀傷患康復，分隊賽都有波入，有佢同稻本潤一响中場發辦，要小勝岡山唔太難，何況過往兩隊5次碰頭，札幌主場4勝1和未輸過，其中3場仲贏到兩粒添。

岡山依家都唔多掂，近7場輸咗5場，得兩場和波攞到分，佢哋都自知大鑊，早兩日簽咗前南韓邊緣國腳黃辰成，希望提升中場組織力，但係呢個前浦項制鐵球員唔係天才級勁嘢，點可能救到岡山吖！