東亞錦男足賽事今日煞科，中國同兩韓都有機會捧盃，尾場响武漢地頭迎戰日本嘅國足，連傷于海、王永珀兩件攻擊主力，平手盤都冇乜着數，不妨追多次中國半場和，起碼有1.9倍，總好過1.52倍入球細。（now633台周日晚8:10直播）

上場中國對北韓推介過半和，結果畀于大寶篤爆，其實中國嗰場可以贏波，除咗換咗9件生牯仔，戰意旺盛過揭幕戰對南韓之外，北韓嘅拚勁明顯唔及撼日本仔嗰場，先至造就國足贏番場。

于海王永珀受傷鋒力減
今場又點？表面睇中國贏番一場提升咗士氣，又有機會攞冠軍，對手又係有深仇大恨嘅日本，主場出擊肯定搏甩髀，贏到二線國腳擔綱嘅「藍武士」唔奇。問題係日本得1和1負已經衞冕失敗，主帥夏利荷錫帶隊幾個月，除咗友賽贏晒，世盃外加東亞賽3場正式賽事都未贏過，批評佢唔肯同球員溝通嘅聲音已經出現。可能因為咁啩，佢老人家開始同球員傾偈，前日仲响球場曬住太陽開會，下令今場對中國一定要贏。日媒話，班國腳喺將近50度高溫下，聽佢訓話23分鐘零3秒，破晒夏帥主持會議嘅紀錄，個個幾乎變人乾，就知日本隊嘅贏波壓力有幾大。

日本唔贏唔得，和都要包尾，中國同樣唔輸得，否則「消極抗日」都幾大罪，但係佢哋和都可能執番個亞軍，有條件玩得保守啲，而且中場王永珀、于海都傷咗唔出得，攻擊力同創造力都打個8折，呢場「武漢會戰」中國多數守字行先，前45分鐘冇交收唔係奇事。