英超開季即刻有場「倫敦打吡戰」上演，阿仙奴今晚喺主場對韋斯咸，吼實1.75倍「讓球主勝」。兵工廠喺季前賽全勝，而且連續10次對賽贏波，相反「錘仔幫」新領隊比歷得把口淨係識講「我以為」，未開咧已被網民恥笑做「藉口哥」，邊撐得過呀？（now621台周日晚8:30直播）

阿仙奴喺季前賽5戰全勝，包括重奪酋長盃同社區盾冠軍。雖然外界覺得，今季係兵工廠近10年來奪取英超冠軍嘅最好機會，但領隊雲格提醒球員咪自滿，仲話要爭前4名，甚至搶冠軍嘅話，季初比賽「一吋都唔可以退讓」，落柯打要球員打響頭炮。

現時阿仙奴有前鋒韋碧克同中場路斯基未好番，中場韋舒亞又傷埋，但兵工廠未算出現傷兵潮，雲格都話，暫時唔需要冒險派復操嘅王牌阿歷斯山齊士上陣。咁又係嘅，兵工廠連續10次喺打吡戰砌低韋斯咸，根本恰到對方上心口，使乜怕先？

韋斯咸踢走艾拿戴斯後，安排比歷接手領軍，齋睇季初表現就完全唔合格。日前佢哋喺歐霸盃外圍賽作客以1:2不敵艾斯特拉，兩回合計輸3:4出局，賽後比歷夠膽死話，收起佢心目中嘅大部分正選冇去羅馬尼亞，原因係「佢以為」副選都夠殺喎！

「藉口哥」比歷冇料到
其實比歷喺歐霸外上一圈對拜基卡拉，已經試過收起晒啲主力，仲嗌人幫手帶隊去比賽，自己就去主持集訓，搞到畀對手喪鬧佢唔識尊重人，連球迷都笑比歷戰績差又多藉口，加埋前鋒安拿華倫西亞同安祖卡路爾養傷，恐怕今場賽事9成輸波。