歐洲唔少主流聯賽相繼開鑼，但北歐聯賽正慢慢進入戲肉，今晚挪超有場獨腳戲，由薩普斯堡主場對維京。薩普斯堡近期陷入頹勢，已經連續8場贏唔到，加上有唔少傷兵，今仗就算有主場之利，相信亦難贏近期表現神勇嘅維京，阿King睇好維京可以作客贏波。（周日凌晨零時開賽、馬會網上文字直播）

薩普斯堡後防穿窿
薩普斯堡一對箭頭摩達臣同彼德高華斯上周皆有入波，可惜球隊後防傷兵多，導致前面入埋唔夠後面輸，最終以2比3不敵洛辛堡。薩普斯堡最近嘅戰績認真麻麻，球隊已經連續8場聯賽未贏過，而且近5次喺主場出擊只得1和4負嘅成績，主場之利可說蕩然無存，今仗更有後衞卡積迪貝治、施格路斯迪同中場佐基姆湯馬臣唔踢得，想贏波絕對唔係易事。

維京剛同尼日利亞前鋒奧斯達捷基尼達成離隊協議，同時簽入可以出任前鋒或中堅嘅英格蘭球員基化摩亞。維京上仗因為後衞卡路麥斯擺烏龍，先喺主場以0比1輸畀侯格辛特，但之前嘅表現其實唔錯，而且入球能力相當高，近7場作客更攞到5勝2負嘅成績，今仗面對態沉並有主力缺陣嘅薩普斯堡，相信有望贏波一吐烏氣，維京平手盤抵捧。