報答領導人 死砌政敵南韓
女子東亞錦標賽最後一輪賽事，同樣兩戰兩勝嘅南韓女足同北韓女足，今日在武漢正面交鋒，直接決定冠軍誰屬！北韓女足得失球較佳，打和都可以捧盃，但由於對手係「政治死敵」南韓，相信北韓仍然會全力爭勝，以報答國家領導人金正恩。南韓兩場勝仗都贏得好險，睇怕今次頂唔住「鐵娘子」北韓女足，要客W。（now633周六下午5時10分直播）

北韓女足繼捧走上屆東亞錦標賽冠軍，上年亦贏埋亞運金牌，今屆又發威，兩戰全勝共攻入7球。其實北韓女足能夠跑出，好大程度因為日本、南韓只派出二線兵參加東亞錦標賽，反觀北韓全力出擊，皆因佢哋必須向國家領導人金正恩交代，絕對唔可以鬆懈，否則後果「嚴重」。北韓女足抱破釜沉舟心態，落場肯定搏命，領隊金維民亦話，球隊心理質素強，係上仗擊敗中國嘅主因，反映佢哋鬥心一流。

中女殘陣 明益日本
北韓女足另一大優勢係攻擊點多，已有4位球員取得入球，中場李藝京、蔚熙心及前鋒羅思心，各有兩球進帳，攻力強橫，南韓女足好難招架得住。南韓女足上仗踢到補時入波，驚險反勝日本女足2比1，連續兩場陷於苦戰，體力消耗大，面對以體力雄渾見稱嘅北韓女足，更加輸蝕。

尾場東道主中國女足對日本女足，「中女」兩場輸晒，中場龐豐月因為首仗對南韓女足不滿被換走，掟水樽發洩，結果被主帥郝偉開除，加上傷兵問題嚴重，只有15人可用，形勢相當惡劣。日本女足中場中島依美上仗為球隊打開紀錄，最終補時輸波，的確唔抵，今仗有機會喺殘陣「中女」身上搵到着數。(now633周六晚8時10分直播)