「野獸」泰維斯今夏英雄式回歸小保加，上仗主場對基爾梅斯首次上陣雖然腳頭唔錯，小保加順利以2比1擊敗對手，暫以1分優勢排喺榜首，不過泰維斯嘅回歸騷就被隊友搶盡風頭，今場小保加作客貝格拉諾，「野獸」誓要入波顯身價，客勝值得捧場！

（周一早上8時30分開賽）

泰維斯有幾勁唔使我多講，而且佢依家先31歲，仲係喺當打之年，嚟到阿甲呢啲水準較低嘅聯賽，梗係要做主角「口架」喇！不過小保加上場對基爾梅斯，兩個入波統統都冇佢份，更令人意外嘅係，小保加嘅致勝入波係由21歲新星卡里利射入，而且仲要係超高難度嘅「Rabona」交叉後腳入波，睇到連有份入場打氣嘅球王馬納當拿都企晒起身，拍爛手掌，完完全全將「野獸」風頭搶晒！

作客夠贏貝格拉諾
小保加今場作客第5位嘅貝格拉諾，泰維斯肯定會搏盡，爭取回歸後首個入球，加上貝格拉諾有後衞沙治奧艾斯古迪路重創長抖，防守並唔算太穩陣。小保加榜首優勢唔大，今場冇失分空間，好在佢哋近兩次作客都能擊敗對手，今場一於再追客勝！