史達寧誓領曼城W

「上艦撻Q」奇恥大辱
國冠盃「澳洲站」重頭戲曼城火併皇家馬德里，將上演一幕「藍月亮」將帥大報復！曼城領隊比歷連尼5年前被「銀河艦隊」炒魷，含恨離開，磨刀多時重遇仇人，勢必要做齣好戲。史達寧被皇馬嫌貴而放棄收購，今仗正係向對方顯示身價良機，肯定搏命。反觀皇馬新帥賓尼迪斯同C朗「暗戰」，影響軍心，曼城可乘虛而入，捧主W。（有線61、64、201、203台周五晚6時直播）

比帥難忘當年被炒
比歷連尼09年挾「球壇工程師」美譽執教皇馬，但做咗一季就被炒。其實當年「銀河艦隊」成績唔算差，喺聯賽只係以3分之差屈居巴塞之下，成為亞軍，可惜皇馬冇畀多次機會比歷連尼就炒咗佢，比帥對此一直耿耿於懷，更批評皇馬淨係識收購球星，冇考慮實際需要，令自己成為代罪羔羊，比帥對皇馬會長皮里茲恨之入骨。佢依家所率領嘅曼城，亦擁有強大人腳，絕對有本錢擊敗皇馬，一吐烏氣。

另外，皇馬本來有意簽史達寧，但之後打退堂鼓，搞到佢空歡喜一場，最終轉投曼城，同利物浦不歡而散，未來仲要留喺英超鬥紅軍，難免尷尬。呢位英格蘭新星咁快就有機會鬥「銀河艦隊」，梗係要顯身價，令對方後悔。佢上仗鬥羅馬迅速入波，開局順利，有助提升信心，今仗或繼續有精彩演出。

皇馬將帥不和
皇馬上仗同羅馬悶和0比0，仲射輸埋12碼，球星C朗明顯缺態。最大問題係自從爆出賓尼迪斯想減少C朗上陣時間後，兩人被傳有心病，近日C朗操練時，表現浮躁，一時怒掟「龜背」，一時故意大力踢走個波，甚至傳佢同賓帥有爭執，仲爆粗宣洩不滿對方嘅訓練方式，提早返回更衣室，要會長皮里茲親自打電話安撫佢。皇馬將帥不和，前景不妙，對住曼城隨時要輸波而回。