今日批日職裏面，最勢均力敵嗰場唔使問實係柏雷素爾對川崎前鋒，但係均勢波未必會係悶戰，因為呢兩班波打法相似，都係進攻風格，1.68倍入球大值得一試。（開賽時間：周日晚6:00）
川崎遭富力撬牆腳
落筆前睇過日本媒體嘅分析同博彩投票走向，發覺呢一輪浦和紅鑽、大阪飛腳兩個主W，同埋甲府風林客W都係壓倒性大熱，鍾意跟大圍嘅可以諗吓，不過紅鑽、飛腳嘅對手都唔弱，贏都會好吃力，甲府更加騎呢，由初盤結構睇，係有和冇贏格局，呢3場波似乎點比都唔及「柏川戰」開大機會咁高。
柏雷素爾、川崎兩隊波都崇尚攻擊，防守就甩甩漏漏，只係部分戰術細節唔同，所以2007年起埋牙8次，開咗7大1細，真係閤埋眼追都有錢贏。當然從牌面上去睇，柏雷素爾可以秤高半線，一則係2011年起主場出戰，佢哋曾經4勝川崎，二則係川崎剛啱畀中超嘅廣州富力撬牆腳，中場件10號仔雲拿天奴4日前突然宣布離隊，去咗大陸賺人民幣。
少咗呢件巴西兵，川崎嘅後上攻擊力點都會打折扣，頂佢嗰件杉本健勇得22歲，能唔能夠勝任好惡講，唯一好彩係佢哋仲有大久保嘉人、中村憲剛呢啲射得之人，有條件同柏雷素爾班神鋒工藤壯人、基斯坦奴達施華鬥士哥，呢啲波梗係博佢開大啦。
