朗拿甸奴重返巴甲，加盟富明尼斯，今仗可望首次為富軍披甲，主場對華斯高。以「細哨」名氣，無疑令巴甲增添話題，但佢始終已經35歲，近年水準走下坡，而心態上更加「玩味」十足，所以唔好對佢抱有太大期望。慶幸富明尼斯走勢凌厲，相信可用勝利為朗拿甸奴開「歡迎派對」，阿King捧主W。（周一凌晨3時開賽）

朗拿甸奴4年前離開歐洲球壇後，幾乎每年都轉會，包括上季加盟墨西哥球隊克雷塔羅，表現麻麻之餘，又經常掛住去玩去蒲，以致無故缺席操練，搞到同球會關係破裂，最終都要執包袱。等咗近兩個月，先至獲富明尼斯收留，證明佢已淪為籮底橙。富明尼斯簽佢，似係宣傳手法，吸引傳媒報道同球迷入場，多於旨意佢爭標。

華斯高沉淪兼兵疲
撇開「細哨」因素，富明尼斯今仗都有力全取3分，陣中仍有前巴西國家隊射手費特，以及21歲新星史加柏，後者近兩仗都有波入，加上今季主場7戰5勝2和，贏面相當大。華斯高跌至尾二，實力同富明尼斯有距離，加上剛於上周中踢完巴西盃，體力難免輸蝕，捧以逸待勞嘅富明尼斯穩陣。

另一位巴西球星柏圖就醒神好多，近兩仗轟入3球，協助聖保羅取得兩連勝，今輪作客對住防線多甩漏嘅利斯菲體育會，可望再下一城，聖保羅受讓平半，要下盤。至於彭美拉斯獲得巴拉圭著名射手巴里奧斯加盟，配合主場4連勝氣勢，可輕取山度士。