獅城爭霸 晒冷冧星粉
喺新加坡舉行嘅英超亞洲挑戰盃今晚上演決賽，愛華頓火併阿仙奴，賽前兵工廠眾將狀甚輕鬆，又玩水又學功夫，上仗連後備都冇份嘅奧斯爾、基奧特、辛迪卡索拉同新加盟嘅門將施治，養精蓄銳應付今仗，遇上未弗嘅愛華頓，誓要贏波捧盃攞頭彩，1.65倍客勝不容錯過。

（now 621周六晚8時30分直播）

泳池玩「夏水禮」消暑
由於新加坡太熱，阿仙奴賽前嚟個「夏水禮」，喺泳池玩接力頭槌兼消暑，而禾確特、艾朗藍斯同高基連早前更去學馬來群島嘅武術招式，見佢哋戴晒頭飾雞手鴨腳咁，非常搞笑。阿仙奴首次參與呢個賽事，首仗對住新加坡明星隊派出大批新仔，雖然靠艾卡邦連中三元大炒4球，但粉絲見唔到球星都幾掃興。雲格跑慣江湖點會唔識做，相信今晚決賽對番英超球隊愛華頓，一班主力好似奧斯爾、基奧特、辛迪卡索拉同新加盟嘅門神施治會上陣。

新加坡明星隊唔夠史篤城砌
愛華頓憑互射12碼淘汰史篤城，但球員狀態麻麻，尤其「新魔獸」盧卡古屢失良機，今年回歸嘅迪路菲奧得個快字，令「拖肥」前線無計可施，若非菲臘積基爾卡一次快速靚包抄解圍，史篤城甚至有機會喺法定時間KO對手，今仗撞正「打真軍」嘅阿仙奴，恐怕難以招架，一於撐兵工廠1.65倍客W首度稱霸此盃打響頭炮。

季軍戰由新加坡明星隊迎戰史篤城，東道主實在太曳，上仗面對hea踢嘅阿仙奴都吞4蛋，佢哋之前對祖雲達斯、馬體會、般尼等外隊全部輸晒，擺明質素有限。史篤城上仗對愛華頓踢得唔錯，新加盟嘅祖斯盧辛馬田可能未夾熟，仲有另一射手馬美迪奧夫掛帥，相信可輕取新加坡明星隊，直取讓球客勝。

（now 621周六晚6時直播）