今日批日乙入面，大宮松鼠個主W可以話係球迷熱門之選，日本Toto個網民估波投票，更加有91%嘅人睇好主隊必勝，係全日預測最一面倒嘅，不過大宮呢次主場對岡山綠雉個入球細，得1.59倍太熱，好唔得過1.52倍主勝幾多，博2.35倍「主主」或者仲抵玩。（開賽時間：周日下午5:00）

打真軍唔放過岡山
大宮呢班波星味唔算濃，但係人腳公認屬於日職級別，降班打日乙自然超晒班，所以佢哋能夠响積分榜帶頭領先8分咁多，一啲都唔係奇事。由於大宮決心升班唔係得把口講，而係咬牙切齒打真軍，佢哋嘅表現唔似得大阪櫻花之流咁陰陽怪氣，今季日乙追正路賽果，呢隊波肯定係首選。

問題係大宮今日唔止有中場金澤慎坐波監，更關鍵係佢哋呢季主場從未炒起過對手，1:0、2:1各出現兩場，2:0出現過4場，即係話好多時候都係僅熟，11次主場更開咗9次細，顯而易見，佢哋鍾意穩中求勝，足智彩個入球細咁熱，應該就係呢個原因。

可能摸熟晒大宮啲路數，岡山件後衞篠原弘次郎講到明要搶分，你咪以為佢吹水，早响首循環岡山主場對住大宮，大宮雖然有17次攻門，仲搏到個12碼，都係0:0收場，明顯岡山有辦法守住大宮。當然，大宮今日主場出擊可以睇高一線，岡山亦未必好似上次咁好彩，所以2.35倍「主主」係堅抵博。