薩爾瓦多鋒線1傷1冇態
睇得唔打得、打得又唔踢得，到底卡爾萬講緊啲乜？之唔係薩爾瓦多嘅鋒線囉！佢哋兩件當家射手拉菲爾貝高斯、尼爾遜保利拿，一個冇料到、一個受咗傷，聽朝喺美洲金盃B組硬撼「剋星」哥斯達黎加，想唔輸都幾難，但鑑於哥斯達黎加近5次贏親都鍾意煲魚生粥，一於博3.05倍「讓球和」啦！ （開賽時間：周日早上9:00）

拉菲爾貝高斯稱得上係薩爾瓦多嘅「偶像派」前鋒，依家喺挪甲費特列斯達搵食嘅佢，雖然係國家隊入波最多嘅國腳，弊在佢近年喺球會同國家隊都淪為副選，最慘係貝高斯自4月中喺聯賽入波後，至今已經連續12場食白果，名副其實睇得唔打得！

薩爾瓦多近8戰6場冇波入
屬於「實力派」嘅薩爾瓦多箭頭尼爾遜保利拿，上月喺世界盃中北美洲區外圍賽演出醒神，兩鬥聖基茨和尼維斯省入3粒，今屆喺金盃仲擔大旗攻堅，點知佢喺首戰鬥加拿大慘被對手踢中塊面，落場唔夠一個鐘就退下火線兼送院治理，今場冇咗佢掛帥，預料艾雲靴里拉頂替其位置，更何況班波近8戰6場都冇波入，火力啞火，睇怕領隊艾拔洛加實有排閉翳咯！

哥斯達黎加往績佔優
另邊廂嘅哥斯達黎加牌面秤先，原因係對手鋒線惡唔出樣，加上兩軍近19次對壘，哥斯達黎加取得12勝5和2負，往績明顯佔優，要贏波拎3分落袋難度唔大。但值得留意嘅係，佢哋近5次擊敗薩爾瓦多全部「僅熟」，加上進攻好手拜仁雷斯、祖爾甘保又唔算Top Fit，望落唔似大炒格，今仗隨時再煲魚生粥都未定喎！

金盃B組