利物浦提早封王後，日前作客曼城雖獲列隊歡迎，但最終慘吞4蛋而回，祝捷變掃興，餘下6場要爭取破百分（尚欠14分），怕且冇樂觀的球迷所想所易了。今晚紅軍回師無敵主場，迎戰護級分子阿士東維拉，是否可以知恥近乎勇呢？讓至球半，上盤唔太抵玩。

相隔30年再奪頂級聯賽冠軍，利物浦的歡躍是任何人都感受得到，包括過來人英超名宿堅尼與法比加斯。大敗於曼城腳下後，兩人都作出很直接的評價，就是紅軍的勝利香檳喝多了，導致場上舉步維艱，但他們並沒有責備球員的意思，並補充這乃人之常情也！捧盃都唔慶祝，唔通降班至慶祝？

此所以利物浦在最後6場比賽能夠取得甚麼戰績，端視他們的香檳究竟飲完未，而飲完的話又會唔會再嗌而已！

比賽之前，爭1分就可以捧盃，與及輸10場都肯定可以封王，絕對是兩種完全不同的心態，雖然領隊高普一向高要求，但畢竟球員近兩季已贏下4大錦標冠軍，相信也不好意思斥責他們，故白頭沈並不認為紅軍在最後階段，仍可交出前仗大破水晶宮時的超高水準。

那邊廂利物浦勝負等閒，這邊廂到訪的阿士東維拉卻拿少一分都唔掂，否則來季英冠見面。維拉復賽以來未嘗一勝，4戰只得兩和兩負，不過輸波兩仗都只是僅負1球。而且該隊護級心切，決心是比主隊來得堅決，獲得大幅受讓，下盤未嘗沒有一搏的價值。