U23亞洲盃A組最後1輪賽事，伊朗U23對中國U23，中國兩戰兩敗，如要出線，除寄望敍利亞U23輸波之外，自己今仗亦要大勝伊朗3比1或以上。事到如今，國奧隊已冇得選擇，惟有豁出去一搏，至於伊朗亦冇失分空間，相信會主攻爭勝，首選入球大。

（now 671周二凌晨零時30分直播）

A組東道主卡塔爾U23兩戰兩勝有6分，伊朗U23及敍利亞U23各有3分，中國U23連續兩場輸1比3排包尾。賽制上同分先計對賽成績，所以只要敍利亞輸畀卡塔爾，中國淨贏伊朗兩球，以及入波達3球或以上，屆時3隊對賽就同分，如果連對賽得失球差亦一樣，中國都可憑較多對賽入球晉級。換言之，中國今仗最少要贏伊朗3比1或以上，先至有價講。

卡塔爾敍利亞亦吼「大」
中國今仗有中場徐新、門將杜佳停賽，創造奇迹機會渺茫，但相信仍然主攻求勝，點都希望贏番場交代。而伊朗U23只有3分，亦要贏波，否則好可能出局，既然雙方都急於求勝，勢必鬥攻，入波唔會少。

至於卡塔爾U23對敍利亞U23，卡塔爾和波都可出線，但身為主辦國冇理由死守求和咁失禮。敍利亞僅得3分，今仗仲要搏命搶分，應會有一番激鬥，同樣揀入球大。

（now 672周二凌晨零時30分直播）