西甲榜首3雄今晚會輪住登場，皇家馬德里率先主場鬥希杭，之後同市嘅馬德里體育會作客拉斯彭馬斯，壓軸戰就係巴塞隆拿主場惡鬥畢爾包。3隊目前積分接近，有任何閃失，榜首形勢隨時出現逆轉，因此3強為爭標肯定唔會留手，即使要讓波都難唔到佢哋。

皇馬大炒希杭冇難度
打頭陣嘅係排第3嘅皇馬對排18位嘅希杭屬強弱懸殊之戰，新帥施丹上仗首度領軍即以5比0大炒拉科魯尼亞，展現恐怖攻擊力。皇馬今仗雖有後衞沙治奧拉莫斯同前鋒加里夫巴利上陣成疑，但賓施馬、C朗同艾斯高狀態都唔錯，炮製入波唔係問題。至於作客嘅希杭已連輸3場，作客更加錄得7連敗劣績，今仗又有後衞貝拿度荷西及中場沙治奧艾華利斯因傷倦勤，去到巴拿貝相信難逃大敗，讓球主客和皇馬讓到3球都冇有怕，捧讓球主勝。

（now 632周日晚上11時直播）

馬體會打殘拉斯彭馬斯
榜首嘅馬體會作客第16位嘅拉斯彭馬斯牌面佔優，馬體會近5仗錄得4勝1和，無論主場作客都交出水準，今仗縱有堤亞高文迪斯同前鋒費蘭度托利斯有傷，但其他球員好似基沙文、恩歷克卡拉斯高等都勁弗，有力延續佳績。拉斯彭馬斯近況雖唔錯，但實力始終有距離，加上後衞大衞施蒙停賽，中場查維卡斯迪蘭奴、靴蘭杜積奴、阿斯祖布與及後衞比加斯同安祖盧比斯全部傷晒，兵源短缺下主場惡唔出樣，讓球主客和馬體會讓一球，捧讓球客勝。

（now 632周一凌晨1時15分直播）

巴塞勢盛夠贏畢爾包
尾場排第2嘅巴塞會主場對第8位嘅畢爾包，今仗已係兩隊今季第4次交鋒，嚟緊西班牙盃8強兩隊又會鬥過，認真係「歡喜冤家」。巴塞上周中西班牙盃擊敗愛斯賓奴，球隊3連勝狀態甚勇，今仗更有蘇亞雷斯復出，加埋美斯同尼馬，入波有保證。畢爾包近況反覆，加上呢場係連續第3場作客，球員體力或有影響，加上前鋒阿度里斯停賽，中場魯爾加西亞同伊拜高美斯有傷，實力受損下作客魯營更唔樂觀，讓球主客和巴塞讓二球，照捧讓球主勝。

（now 632周一凌晨3時30分直播）