英超夜演「雙紅會」，利物浦主場大戰曼聯。有傳「紅魔鬼」如今場輸波，領隊尹戈爾就會「被辭職」，不過科娜覺得呢單都係煲水新聞居多，一來尹帥「福大命大」，早排連續8場不勝都唔使落台，二來「紅軍」傷兵太多，陣容天殘地缺，尤其防線更加係大穿窿，近年4次對陣全部輸晒，計落曼聯真係好難輸，受讓值得支持。

（now 621周日晚10時05分直播）

傷兵成籮後防重災區
利物浦狂野教頭高普同曼聯「方丈」尹戈爾之前喺德國已經交過手，分別帶領德甲兩大球會多蒙特同拜仁慕尼黑，雙方交手4次成績係打和2比2，其中「方丈」曾帶領拜仁炒過多蒙特5比1，而2011年2月多蒙特作客擊敗拜仁嘅德甲冠軍戰，更係「蜜蜂軍團」20年來首次喺拜仁主場贏波，一個禮拜之後，尹戈爾就被告知球季結束後拜仁會同佢解約。唔通命運會再一次安排高普令到「方丈」被炒？

不過睇番現時情況，高普想帶領利物浦擊敗曼聯，難度比帶領多蒙特KO拜仁高好多，首先當年嗰支「蜜蜂軍團」已經成形，高普用咗大約3年時間打造出一支冠軍隊伍，但依家佢只係接手「紅軍」短短百零日，仲遇上嚴重傷兵問題，王牌球星菲臘比古天奴、一對中堅洛夫雲同史卡迪爾都因為腿筋有傷缺陣，要靠老將高路托尼同冇態嘅馬馬度沙高死頂，門將米洛列特又頻頻「派膠」，上場鬥阿仙奴失咗3球，有兩球佢都要負責，真係睇到利迷眼火爆！

朗尼腳風順番等開餐
曼聯近況略有好轉，攻力有番啲改善，朗尼更係連續3場有波入。睇番數據，原來呢位紅魔隊長有個連續4場入波嘅習慣，對上4季都係咁，正宗係「一係唔入，一入就連續4場都入」，今場對防守力弱嘅「紅軍」，朗尼又可以開餐喇喂！再加上尹戈爾執教曼聯後，對上4次鬥利物浦都贏晒，簡直係「紅軍」剋星。各位想睇曼聯輸波、「方丈」下台嘅朋友，睇怕都要等多一排喇！