意甲、西甲、葡超今季爭標形勢非常激烈，同樣出現前列三四支勁旅咬住上，每輪戰果都足以令排名變天。三支「一哥」國際米蘭、馬德里體育會、士砵亭當然不敢怠慢，為保衞榜首之位，今晚勢必豁出去！

士砵亭弗爆速食布拉加
葡超傳統「Big 3」士砵亭今季終於復興，目前力壓兩大死敵賓菲加及波圖，佔據榜首。士砵亭聘請名帥佐治捷西斯領軍，演出脫胎換骨，梗係要好好把握機會，爭取一搔聯賽14年之癢，爭標士氣非常高昂，今仗主戰布拉加，相信上半場已可KO對手，首選半場主勝。（周一凌晨零時開賽，馬會網上文字直播）

葡超過去13季聯賽錦標被賓菲加及波圖瓜分，今季士砵亭復興，令爭標形勢出現大變，呢支「綠白兵團」突圍關鍵在於請來佐治捷西斯執教，呢位61歲老帥曾帶領賓菲加3捧葡超冠軍，5奪葡聯盃，仲有兩次打入歐霸盃決賽。佐治捷西斯喺季前就率先助士砵亭贏得葡萄牙超級盃，名副其實嘅冠軍教練。

士砵亭喺佐治捷西斯領軍下，攻守兼備，聯賽首循環分別大勝賓菲加3比0，贏波圖2比0，而且都係上半場取得領先，贏得好有說服力。士砵亭對弱隊從不手軟，上仗大炒塞圖巴爾6蛋，明顯狀態好弗。

布拉加客戰往績輸晒
布拉加雖然排第4，但比士砵亭少12分，可見雙方級數有一大段距離；事實上，布拉加近5次聯賽作客士砵亭都輸波收場，再睇埋佢哋上仗作客塞圖巴爾，上半場4分鐘就落後，遇上強勢嘅士砵亭，更加難以招架。

國米必薩技煲魚生粥
國際米蘭今晚意甲早場亮相，主場迎戰薩斯索羅，國米今季憑「悶蛋足球」大翻身，大部分時間高踞榜首，雖然踢法可觀性麻麻，但勝在夠實際，教練文仙尼應會繼續貫徹「煲魚生粥」。薩斯索羅遇強愈強，韌力十足，就算輸都係小敗居多，國米主Ｗ太熱乏味，寧揀入球細。

（TVB 301周日晚7時30分直播）

國米歇冬後首戰贏安玻里1比0，今季18場聯賽竟然有9場小勝1比0，開細比率高達67%，重現傳統意式保守風格，悶親唔少球迷。不過，講到尾成績先至最重要，文仙尼採取「悶蛋足球」，令國米擺脫近年頹勢，重返爭標行列，證明改革奏效，冇理由畀佢停，就算主場出擊，預料都唔會亂攻。

薩斯索羅豬頭骨唔易炒
薩斯索羅上季曾作客慘吞國米7蛋，前車之鑑，今趟應會打醒十二分精神，避免再出醜。事實上，薩斯索羅今季有明顯進步，唔經唔覺躋身前6位，當中17場聯賽僅3敗，可見要贏佢哋並非易事。薩斯索羅最犀利係今季鬥前列強隊拿玻里、羅馬、祖雲達斯、費倫天拿等名牌都保持不敗，相信今晚有力同國米周旋，隨時出現拉鋸局面，最佳投注入球細。

馬體會客Ｗ1.75倍咪嫌少
西甲一哥馬德里體會今輪作客砌排第5嘅切爾達，「床單兵團」勝在硬淨到暈，兩名新兵奧古士圖費南迪斯及卡尼維達又表現對辦，但目前比追兵巴塞多踢1場，為保榜首地位，今仗對住近況回落嘅切爾達不容有失，客Ｗ有計。

（now 632周一凌晨3時30分直播）

同火力強勁嘅巴塞及皇馬相比，馬體會走務實路線，最能體驗呢點就係固若金湯嘅防線，開咧至今聯賽只失8球，為西甲之冠，以高甸、佐治高基、基比為首嘅悍將助陣下，想贏佢哋絕非易事，前面靠基沙文打突擊，令佢哋經常小勝一球起、兩球止。而馬體會喺冬季轉會窗重開後，撬走切爾達中場奧古士圖費南迪斯、同時收回卡尼維達，兩人極速融入球隊，獲得主帥施蒙尼激讚，陣容可謂如虎添翼。

切爾達歇冬後連敗
相反切爾達歇冬後表現跌Watt，聯賽連輸兩仗，今仗除有主力洛尼圖及方達斯因傷倦勤外，魯賓白蘭高要坐波監，實力受削。未計周六晚賽果，馬體會僅領先巴塞兩分，仲要打多1場，呢個一哥位好唔穩陣，為保優勢，今遇態沉嘅切爾達，贏波志在必得，馬體會客Ｗ有1.75倍咪嫌少。