「地標戰」志在熱身兼試陣
英超要到8月先開波，但韋斯咸今晚就已經要展開佢哋嘅新球季，喺歐霸盃外圍賽首回合主場對安道爾球隊路施坦斯。雖然「錘仔幫」整體實力肯定高幾班，不過佢哋位新領隊比歷上任冇耐，班球員好難咁快就適應到佢套Form，今場鬥路施坦斯目的志在試陣兼熱身，好難要求佢哋大勝一場，入球中位數開到3.5球，博「入球細」點睇都係最划算。（開賽時間：周五凌晨2:45）

韋斯咸今年個暑假放得個零月，嚟到7月頭已經要喺歐霸盃外圍賽出擊，今晚佢哋會喺主場對住歐洲賽經驗唔多嘅路施坦斯，呢場波亦係新領隊比歷嘅「地標戰」。「錘仔幫」同前領隊艾拿戴斯「分手」之後，喺6月初宣布委任比歷成為新教頭，呢位曾經帶過克羅地亞國家隊嘅教頭名氣雖然唔細，但嚟緊一季英超殺唔到入前8名就冇Bonus，萬一降班要辭職仲冇錢賠，合約條件超苛刻！不過，比歷就好正面咁話會將「不平等合約」視為動力，誓要將「錘仔幫」帶上高峰咁話喎！

埋班唔夠1個月

炒唔起路施坦斯
雖然計實力、計戰意，韋斯咸都肯定贏安道爾球隊路施坦斯幾班，不過比歷唔係超人，上任短短唔夠一個月個帥位都未坐暖，「錘仔幫」班球員復操冇耐，熱身賽又一場都未踢過，好難喺咁短時間內適應到比歷套新戰術，場上演出肯定大打折扣。

對手路施坦斯雖然冇乜歐洲賽經驗，但相信都唔會自大到夠膽作客同韋斯咸鬥攻，以「錘仔幫」今時今日咁嘅狀態，贏到都唔似會大勝，「入球細」值得捧場啦！