巴塞防线非铁壁
好多人都认为，今晚欧联4强首回合巴塞隆拿主场对利物浦，係一场提前咗嘅决赛，我对呢点绝无异议，巴塞曾5度封王，利物浦上届才杀入决赛，两军都具备登上欧洲之巅嘅实力。
造访鲁营球场从来唔係易事，到底利物浦係咪会以守为攻，希望首回合先求唔输呢？我觉得未必，首先红军以穆罕默德沙拿为首嘅前线三叉戟，弗到爆灯，今季从RB莱比锡加盟嘅中场拿比基达，已经逐渐融入球队，经常后上入楔，犹如第4名前锋，中坚华基尔云迪积克不但在防线一柱擎天，亦不时藉死球杀上前助攻有斩获，我相信其主帅高普不会坐以待毙，深明死守都未必可保住唔输，倒不如主动争取作客入球，反而仲有利。另一边厢，巴塞球王美斯勇达巅峰，入球助攻瓣瓣有，仲有倒戈相向嘅苏亚雷斯及菲腊比古天奴，攻力之强唔使怀疑，反而佢哋防线唔算顶级，预计係斗攻格局，入球骚可期。
「苏B」决策失误拖累曼联
顺带讲讲，近期频频甩辘嘅曼联门神迪基亚，在上仗对车路士再度出丑，对于呢位已充满离心嘅门将，主帅苏斯克查不但冇作出应变措施，改用另一门将罗美路，反而出言维护迪基亚。可见曼联表现大跌Watt，除咗球员表现恶心外，「苏B」欠缺领军征战顶级联赛经验，作出一些失误决策同样有责。
巴塞锋强后衞一般，红军中前亦具斤両，今晚决战鲁营睇入球骚。