王者之战撑法国
克罗地亚伤疲交煎
万众期待嘅世界盃终于嚟到决赛，究竟系法国第二次封王，定系克罗地亚首次捧盃今晚自有分晓。克罗地亚淘汰赛连续3仗踢加时，球员伤疲尽现全靠精神力量支撑住，无论体能、运势都严重透支，捱到最后一刻好易崩溃，乐比睇好以逸待劳嘅「高卢雄鸡」法国，简单捧1.82倍主胜。
（Viu TV99、Now616及618台周日晚11时直播）
嚟到呢一刻，相信好多球迷都期待奇迹发生，若克罗地亚捧盃嘅话绝对系够晒传奇及话题性，但客观事实系，克罗地亚杀入决赛已付出左唔少代价，场场恶斗真系身心俱疲，加上身边会有隻魔鬼话畀佢听入到决赛已经系了不起嘅成就兼超额完成，面对多一日时间休息、未经历太大风浪进身决赛嘅法国真系好输蚀。
格仔兵靠意志顶住
本来对一个职业球员嚟讲，15日内踢4场波唔算话好恶啃，但唔好忘记格仔兵团近3场波都要踢足120分钟，当中仲有2场要以12码分胜负，令唔少球员都变成十字军，当中以国米嘅比列锡较严重，今仗有机会倦勤，另外右闸禾沙积高、左闸史卓历、中坚洛夫云同门将苏巴锡亦有微伤，虽然克罗地亚战意高涨精神可嘉，好似中场拿杰迪锡上场发高烧都照踢，不过撑得咁行真系随时爆煲。
法国今届表现唔算光芒四射，但却做到以稳先行，具备夺标嘅条件。分组赛头两场小胜稳夺出线资格后，最后一场对丹麦例行公事可回一回气，淘汰赛对阿根廷、乌拉圭及比利时都唔易应付，但法国都能够化险为夷，全靠防线稳健，当中门将洛里斯及防守中场尼高路简迪都应记一功。
法军后备人脚赢晒
法国兵多将广，每个位置都有胜任人选之外，后备力量更非常强劲，即使表现唔好亦会有Plan B同Plan C，呢方面克罗地亚系难以媲美，而更重要嘅系法国嘅把握力真系世界级，两大射手基沙文同基利安麦巴比喺今届赛事都状态勇猛，反击能力超强，即使克军泊大巴亦有基奥特呢架坦克车开路，所以法国喺人脚上同体力上确实明显佔优，即使近年世盃决赛明显旺下盘，连续3届要踢到加时，乐比亦撑法国90分钟内解决对手。