奧燒派牌 激活鋒線
周二凌晨英超獨腳戲，阿仙奴將會主場鬥李斯特城。「兵工廠」喺新廠長艾美利帶領之下愈踢愈有，尤其一班攻擊手嘅入波欲望被激發，火力全開，加上「狐狸」近期作客倫敦都開局搶攻，呢場兩隊隨時一開波就大打對攻戰，中位數1.5球半場大捧得過。

（Now 621周二凌晨3時直播）

艾美利彈性戰術收效
「兵工廠」新廠長艾美利季初上任後，開始逐漸將自己嘅執教理念灌輸畀一班槍手，其中最顯著嘅肯定係令阿仙奴踢得更加直接。雖然艾美利同唔少西班牙主帥一樣，都盛行運用短傳滲透，由後場組織攻勢，不過佢同時都好講求反擊效率，只要有機會出現，阿仙奴就會結合長傳急攻戰術，向對手發起突擊。呢套靈活多變嘅戰術，明顯好啱拿卡錫迪同奧巴美揚兩位槍手正印前鋒嘅口味，上仗面對同市死敵富咸，兩人就先後梅開二度，幫助球隊5比1大勝對手，呢場加埋傷愈復出嘅「奧燒」奧斯爾喺中場派牌，「兵工廠」想數胡真係話都冇咁易。

狐狸作客倫敦易半大
另一邊廂，「狐狸」今季建立起以新星占士麥迪臣為核心嘅踢法，呢位年僅21歲嘅英格蘭中場表現搶眼，早前更加首次被英格蘭領隊修夫基召入國家隊。有佢搭住經驗豐富嘅前鋒占美華迪，「狐狸」前場火力都有番咁上下。可惜後場發揮就明顯差好多，呢場主力守將兼隊長韋斯摩根仲要坐波監冇份踢，防線隱患無窮。李城近5次作客倫敦球隊都贏唔到波，其中4次半場就已經開出兩粒或以上，呢次挑戰「兵工廠」想搶分都惟有以攻代守，入球騷肯定走唔甩，中位數1.5球半場大係好路。