好馬不吃回頭草，領隊或教練翻兜，好多時都冇咩好下場。摩連奴第二度回歸車仔，叫做拎過英超冠軍，但今季爛尾爛到咁，真係令車迷好心傷；納比雖然幫意大利拎過世界盃，第二度帶意軍出戰就搞到分組賽出局，一世英名幾乎盡毀。
巴西唔知係咪名教練短缺，或者冇咩人願意做國家隊教練，好多時都翻兜，好似彭利拿、史高拉利等。𠵱家教練鄧加都喺2006至10年帶過巴西，2014年再接手國家隊；佢第一次接手，原本都叫做有驚喜，令巴西變得攻守更加平衡，但2010年世界盃八強止步，雖然戰績唔算太差，但都要孭鑊下台。冇錯，以𠵱家世界足球潮流，巴西如果再行6、70年代只攻不守嘅態度，就算多兩、三個新比利，要六奪世界盃真係唔易。幫巴西引入防守唔係錯，但鄧加兩個堅持：重用老將同本土兵，就唔係幾得民心。睇睇今輪世盃外大軍陣容，揀四個前鋒有兩個係三字頭；奧利華拉已經35歲，仲要返到巴西踢山度士，都仲得到鄧加青睞，小弟真係唔知畀咩反應好。
戰友咖喱插阿根廷教練馬天奴，但佢哋前鋒多到用唔晒，連希古恩、泰維斯都要打後備；森巴足球出產過唔少數一數二嘅頂級前鋒，球王比利固然唔講得笑，近代都有朗拿度、朗拿甸奴同阿祖安奴等，但到𠵱家陷入前鋒荒，真係情何以堪。如果尼馬有咩冬瓜豆腐，上屆世盃已經有辦你睇，佢一因傷缺陣，巴西就接連喺四強同季軍戰大敗，睇吓𠵱家尼馬又幫到鄧加幾耐？