蓝月亮睇定食红魔锋无力
周四凌晨英格兰联赛盃4强次回合，「蓝月亮」曼城返到主场再同「红魔」曼联合演曼市打吡。曼城首回合领先3比1，优势明显，次回合坐镇主场，唔需要急于抢攻，领队哥迪奥拿必定使出拿手控球在脚战术，唔畀红魔有任何反击嘅机会，一于吼实半场和。

（周四凌晨3时45分开赛）

衞冕英联盃嘅曼城4强首回合火力全开，靠贝拿度施华、马列斯同奇云迪布尼等攻击好手连番发围，成功玩残曼联防线取得3比1胜局。曼城今季争夺联赛冠军希望渺茫，余下目标会着重争取欧联、以及英联盃及英足盃，战意毋庸置疑。查实今季「蓝月亮」进攻问题不大，后防隐患先係令领队哥迪奥拿最头痛嘅难题，好消息係因伤长抖嘅主力中坚拿朴迪已经痊愈，早前联赛面对锡菲联一役正选上阵表现稳健，更成功为球队保住清白身，有这位后防定海神针重回大军，曼城攻守平衡有望进一步提升。

曼城高控球率主导晒
相反曼联虽然啱啱于英足盃取得6比0大胜，但对手只係英甲护级分子灿美尔，战果冇咩参考价值，唔计呢场波，红魔近3仗作客未赢过之余，仲1球都入唔到，虽然由尼曼查马迪同费特洛迪古斯组成嘅中场线默契逐渐形成，但前线进攻唔争气，最后一传质素认真麻麻，临门把握力更是令唔少球迷冇眼睇，加上首回合为曼联破蛋嘅「福仔」拉舒福特呢仗因伤缺阵，红魔锋力好难威胁到蓝月亮后防。睇好曼城再靠高控球率主导场上主动权，今仗开局形势未必会太开放，捧半场和最佳。