今日係年廿八，英超快車一樣繼續，睇中曼聯主場迎戰般尼。雖然曼聯啱啱喺「雙紅會」輸波，但查實表現唔曳，而且近期遇弱復用桑馬達立竿見影，終於唔使再做「羅賓漢」，撞正遇強例腳軟嘅般尼，紅魔必定想大勝一場洗走豬年污氣，讓到1/1.5球照揀上盤。
（Now 621周四凌晨4時15分直播）
曼聯於日前「雙紅會」淨吞利物浦兩蛋，兩軍實力明顯有距離，不過學主帥蘇斯克查話齋，就算輸波都有得着，的確喺場波最後30分鐘，紅魔展開強大嘅逼搶，逼到利物浦有氣冇碇抖，最終因一次反擊輸到0比2，但可以用雖敗猶榮來形容，因此落敗都冇輸鬥心。
重用桑馬達即時有料到
何況曼聯早前暴露出不擅破鐵桶陣嘅弱點，「蘇B」隨即對症下藥，近期多用組織力強嘅桑馬達，呢名西班牙老將既靈巧亦可送出致命傳送，令進攻更立體。曼聯喺之前2次主場出擊均順利取勝，分別以1比0擊敗狼隊、以及4比0大炒諾域治，桑馬達就交出1個入波及2次助攻，如今前鋒拉舒福特因傷有排抖，相信桑馬達會獲得更多擔正機會，支援安東尼馬迪爾，令人期待。
般尼目前仍喺榜下游徘徊，今季聯賽已失掉38球，無復以往固若金湯嘅防守，而且佢哋遇強即屈，近6次對傳統Big6球隊，全部都至少輸2球，包括上月主場迎戰曼聯淨輸0比2，今仗作客更加凶多吉少，讓球盤曼聯要讓1/1.5球都冇有怕，博佢哋大勝反彈。
