及时回勇绝地博翻身
今晚欧联分组赛煞科，其中D组焦点战，利华古逊喺主场硬撼祖云达斯。为出线背水一战嘅利华，就算赢波仲要睇另一场马体会嘅赛果，好在前锋里安拜尼及艾拿利奥轮流发威，冇得谂咁多必搏尽抢Ｗ；祖记已获首名出线，赢输都冇所谓随时斗攻，但今届防守麻麻经常有失波，癫凤斗狂龙必捧2.5球嘅大盘。

（Now 645、有线661及601台周四凌晨4时直播）

祖记现时有13分稳夺D组首名，而马体会以1分暂压利华排次席，换言之利华今场除咗力求3分外，仲要寄望马体会失分，先可望奇迹出线，难度颇高。不过话说回头，利华头3场分组赛输晒，点知喺近两轮连赢马体会同莫斯科火车头，令出线重现曙光，亦证明佢哋未有放弃，今晚主场出击必搏老命抢Ｗ，希望製造奇迹。

利华近期成绩唔曳，连盃赛在内近6仗获5胜1和，包括联赛作客2比1击败拜仁，而呢场省两粒嘅前锋里安拜尼，上仗联赛亦助攻畀拍档艾拿利奥建功，连同养精蓄锐嘅箭头禾兰，向来进攻大过天嘅主帅保斯手握大把筹码。不过利华防线欠稳，近7仗只得两场冇失波。翻查纪录，利华今届两场主场嘅欧联分组赛共失3球，连同16至17年度嗰届，利华近4场欧联主场全开3球或以上，绝对係有前冇后、打死罢就。

祖云达斯防线鬆散
意甲「2哥」祖云达斯已提早出线，应会收起C朗等主力，出副选了事，赢面当然更低。不过祖记最大问题嚟自防线，近12仗有9仗未能保持清白之身，包括啱啱联赛以1比3倒输畀拉素，今季不败金身被破。单计今届5场欧联分组赛，祖记都失咗4粒，以稳阵见称嘅「老妇人」嚟讲，绝对唔合格。既然胜负无关痛痒，预计祖记防守会更鬆散，但同时副选如希古恩等难得担正，肯定会博表现，捧2.5球嘅大盘更上算。