林伯有计恶客出招
今晚英超压轴尾场，「4哥」车路士作客般尼。车仔自少帅林柏特接手后刮起青春风暴，连一度沦为后备嘅基斯甸普列锡都打番生晒，个个抢缰争取表现，加上「蓝战士」近年作客食硬般尼，今季客场又连场报捷，客胜值得再追。

（Now 621周日凌晨零时30分直播）

贵为车仔传奇，林柏特今夏回巢掌舵后，凭佢喺队中嘅极高威望，逐渐带领队波重上正轨。「蓝战士」受禁买令限制，反而畀到林伯放手一搏起用新人嘅机会，佢重点提拔嘅谭美阿巴谦、美臣蒙特等小将，已经成功上位，「谭仔」依家联赛入咗8粒，同曼城箭头阿古路并列射手榜首位添，连同近期伤愈复出嘅赫臣奥杜尔，中前场甚至出现人满之患，搞到贵价货翼锋基斯甸普列锡一度冇碇企。

般尼遇强即屈
好彩，基斯甸普列锡周中喺欧联作客阿积士，交出靓助攻畀巴舒亚伊奠胜，唔觉唔觉佢今季已累积5次助攻，暂时係队中嘅助攻王，可见林伯激活晒成班生牯仔。

位处中游嘅般尼，虽然近5仗取得2胜2和1负睇落唔错，但所赢嗰两场对手只係态沉嘅爱华顿同诺域治，面对利物浦同阿仙奴就输晒，明显遇强即屈。睇番车仔近年造访般尼表现特醒，近5次联赛作客交手取得4胜1和佳绩，合共攻入12粒、仅失4球，其中4次早喺上半场就取得领先优势，加上佢哋今季客场坚劲，唔计喺中立场打嘅欧超盃，计晒联赛同欧联就取得5胜1负，包括近5仗客场赢晒，表现比主场更Sharp，客胜有买趁早。