留力欧联速战速决
今晚英超头场戏码，弗到漏油嘅「1哥」利物浦作客锡菲联。红军开咧后联赛6连胜，多名主力喺周中英联盃都有得抖，养精蓄锐实抢缰，加上要兼顾下周中上演嘅欧联赛事，今场造访识守唔识攻嘅锡菲联，预计红军一定玩闪击战，半场客胜有买趁早。

（Now 621及611周六晚7时30分直播）

利物浦从未赢过英超锦标，上季又一次功败垂成，今季决心捲土重来；事实上红军开季冇耐已经挞着晒，头6轮联赛全胜，而且全部都喺上半场取得领先优势，包括击败实力分子阿仙奴及车路士，气势如虹。啱啱周中英联盃作客以2比0击败英甲球队米尔顿凯恩斯一役，主帅高普半力出击，只用洛夫云、阿历士张伯伦、拉尔拉拿等后备担正，射手穆罕默德沙拿、沙迪奥文尼、罗拔图法明奴、华基尔云迪积克等多名主力均被收起，等佢哋得到充分休息迎接今仗。

锡菲联龟缩顶唔住
锡菲联几经努力，终于事隔12年重返英超，之不过实力只属「有限公司」，淨係识打稳守突击，进攻模式坚单调，对住强队一定龟缩玩死守，希望吼准机会踢反击，偷鸡博取联赛积分。更可惜係最有威胁嘅前锋比利沙柏今场要坐波监，连零星反击力都冇埋，锡菲联日前喺英联盃主场斗甲组仔新特兰，结果又输0比1，坚肉酸兼打击士气，今仗就算有地利都信唔过。

再者，由于利物浦喺欧联首轮分组赛淨吞拿玻里两蛋，作为衞冕之师，下周中次轮出战萨尔斯堡实在不容再失，因此今场定必想速战速决，尽早入波锁定胜局，可于中后段换出部分主力提早休息，迎接欧联关键战；既然红军今季联赛咁锺意先发制人，一于捧半场客胜。