周日凌晨意甲首輪焦點戰，上季亞軍拿玻里將會作客鬥費倫天拿。費倫新賽季大力增兵，其中引入列貝利呢次重量級收購，足以令「紫百合」球迷流晒口水，有佢帶住陣中一班高質後生兵，呢場絕對有力同拿玻里搶分，讓球主勝有計。

（MyTV Gold 301台、Now 638、有線614及654台周日凌晨2時45分直播）

羅辛奴難即時起作用
拿玻里上季由安察洛堤代替沙利領軍，最終以11分差距屈居祖雲達斯之後僅獲聯賽亞軍，球隊今季重整旗鼓，除成功留住富豪球會獵物高列巴利等主力，仲引入效力羅馬嘅希臘中堅文奴拿斯同史帕爾中場菲臘普哥斯達，主力加強中後場，前線剛成功羅致夏榮羅辛奴，但融入需時，現階段沿用荷西卡利祖、梅頓斯、米利克同恩斯治尼等攻堅，進攻板斧同上季相比應差別唔大。

費倫上季聯賽排名16，整體成績令人失望，季尾接手嘅主帥蒙迪拿今季致力圖強，除咗引入奇雲保定同艾歷普爾加兩位中場猛將之外，最矚目嘅引援肯定非前拜仁翼鋒列貝利莫屬，呢位法國老將雖然已經36歲，不過心中團火仍未熄滅，仲話自己想好似羅馬王子托迪一樣踢到40歲。有佢帶住原有嘅基奧雲尼施蒙尼同費達歷高基艾沙等年輕新仔，「紫百合」絕對不能小覷。況且今夏季前球會賽戰績一般嘅拿玻里，近4次聯賽作客鬥費倫僅取3和1負，表現毫無優勢可言，呢次再失分絕對唔出奇，捧番讓球主勝好過。