剛贏得歐洲超級盃嘅利物浦，今晚作客「聖人」修咸頓。「紅軍」開鑼大勝盡顯實力，相反修咸頓作客同級隊伍般尼大敗而回，士氣大受打擊；加上利物浦近4次鬥聖人皆至少贏2球，讓一球照捧上盤。（Now 621周六晚10時直播）

「紅軍」今夏冇重大收購，揭幕戰主場鬥諾域治幾乎用番上季原有班底，上半場就憑奧歷治、穆罕默德沙拿及華基爾雲迪積克各建一功，加埋對手擺烏龍，半場狂數4比0，下半場略為收吓油都贏4比1。到咗周中歐超盃又互射12碼氣走車路士，上周末聯賽後備上陣嘅沙迪奧文尼包辦2個士哥，狀態弗到漏，相信今晚又見番「埃及文明」組合數胡。

修咸頓首戰大敗損士氣
修咸頓首戰作客吞般尼3蛋，士氣受挫之餘後防亦明顯出問題，雖然今晚主場出戰，不過佢哋上季19場聯賽主場僅5勝，主場得勝率排尾2，而且近年畀「紅軍」食住，近4交鋒「聖人」全敗勁失11球，今晚都係凶多吉少，「紅軍」讓一球波童捧上盤。