英超北倫敦夜場，上季「4哥」熱刺主場迎戰升班球隊阿士東維拉。熱刺今季人腳變動少、默契足，相反維拉狂簽12名新兵，猶如新埋班有排執，熱刺可速食對手，轉捧半場主勝。

（Now 621周日凌晨零時30分直播）

拉美拿撻着 火力有保證
熱刺保留上季大部分主力，包括一度盛傳轉投皇馬嘅中場基斯甸艾歷臣亦留隊，佢同哈利卡尼、迪利阿里等夾慣夾熟，默契十足，火力有保證。當然，呢支北倫敦勁旅亦有增兵，簽入中場尼當比利、盧施素及賴恩施斯隆，戰力更上一層樓。上季長期養傷嘅翼鋒拉美拿喺今夏球會賽頻入波堅搶韁，加強鋒線良性競爭，百利無一害，就算孫興民坐波監都唔使驚。

闊別3季後重返英超嘅維拉，大灑1.1億鎊（約10億港元）積極擴軍，先後羅致湯希頓、泰朗明斯、杜格拉斯雷斯、馬莫特查斯古特等12名新兵，同新埋班冇分別，默契近乎零，隨時重蹈富咸上季升班後大換血、最終表現走樣而降班嘅覆轍。事實上，熱刺近3次對阿士東維拉贏晒之餘全部贏2粒，當中2次半場已取得領先優勢，今場可以速戰速決，半場主勝值得捧場。