今晚喺英國愛丁堡默萊菲體育場爆發重量級熱身賽，利物浦硬撼拿玻里。紅軍雖續有「埃及文明」鋒線放緊假未歸隊，但正好畀機會後備前鋒奧歷治爭取表現，加上佢哋近年交手食住拿玻里，主勝捧得過。

（香港開電視77台、有線662及602台周一凌晨零時直播）

拿玻里對賽輸蝕
上屆勇奪歐聯冠軍嘅利物浦，由於「埃及文明」鋒線穆罕默德沙拿、沙迪奧文尼及羅拔圖法明奴，以及門將艾利臣比加之前要踢太公波，依家仍然放緊假，因此之前3場「拍跳」只得1和2負，成績其實不足為據。隊波最近傳來好消息，就係成功同後備前鋒奧歷治續約，呢位喺上季季尾表現神勇、接連喺歐聯4強及決賽建奇功嘅射手，透過續約證明自己力爭上陣機會嘅決心，趁住「埃及文明」鋒線未歸隊，佢喺近2場「拍跳」都有入波，有辦你睇，為博取高普信任，奧歷治今仗必加多兩錢肉緊爭士哥。

踢咗3場熱身賽獲1勝1和1負嘅拿玻里，今夏買人諸多阻滯，既買唔到主帥安察洛堤嘅愛將占士洛迪古斯，連另一目標費基亞亦已轉投貝迪斯，除咗羅馬中堅文奴拿斯加盟外，欠缺具分量新兵，難與實力雄厚嘅利物浦相提並論。睇埋兩軍近4次交手，紅軍取得3勝1負，格食格下必捧主勝。