周一凌晨國冠盃獨腳戲於美國上演，AC米蘭將會硬撼賓菲加。AC米蘭新帥甘柏路了解球隊需時，面對攻擊力欠奉嘅賓菲加，預計兩軍都難打出精彩進攻，尤其AC近年出戰國冠盃開局慢熱，呢場半場和值得留意。
（無綫85台、MyTV Gold周一凌晨3時直播）
新帥甘柏路需時了解
痛失來屆歐聯席位嘅AC米蘭，早前仲放棄埋僅餘嘅歐霸參賽資格，並聘請前森多利亞主帥甘柏路執教，希望呢位意大利教頭能夠協助球隊重建昔日王朝，不過甘柏路上任冇耐，需要時間摸熟隊波。AC鋒線雖有波蘭國腳比亞迪克助陣，可惜呢位射手能力較為單一，佢個前線拍檔森姆卡斯迪利祖同波連尼質素亦麻麻，未能為比亞迪克提供高質輸送，上場面對拜仁慕尼黑，呢組攻擊組合就顆粒無收，累球隊以0比1落敗，呢場想速戰速決似乎都有啲難度。
賓菲加除巴西射手莊拿斯干卡維斯宣布掛靴外，超新星祖奧菲歷斯亦轉投馬德里體育會，喺失去兩位進攻主力下，現時改由瑞士前鋒施費洛域擔大旗，入球能力難有保證。睇埋AC米蘭近4場國冠盃有3次換邊前都同對手打和，面對火力下降嘅賓菲加，預計上半場會係拉鋸，半場和值博。
