大菲領軍保持霸氣
聽朝巴西盃8強首回合有多場大戰，等阿King度番條過關好嘢畀大家。重心彭美拉斯主場鬥國際體育會，巴甲「1哥」彭美拉斯今季表現仍然對辦，攻守有序，對住有多位主力上陣成疑嘅國際體育會，必趁主場之利搶佔先機，讓半一嘅上盤好路。

（周四早上8時30分開賽）

上季喺巴甲封王嘅彭美拉斯，今季繼續由名帥「大菲」史高拉利帶領，各項賽事高歌猛進。彭美拉斯陣容鼎盛，前線有曾喺西甲搵食嘅迪華臣擔大旗，中場隊長般奴哥仙尼更係球隊聯賽首席射手，後防方面亦固若金湯，近10仗全勝之餘，只失過1球咁大把，主力中堅古斯達禾高美斯踢完美洲盃後歸隊候命，實力更見完整。

作客嘅國體會仲係依賴迪阿歷辛度同荷西古里路兩位老將，表現難有保證，尤其後者剛剛幫秘魯踢完美洲盃決賽，雖已返球會報到，但今場未必上陣，加上右閘薛卡亦因傷缺陣，難同班霸彭美拉斯周旋，捧上盤冇衰。

串甘美奧細法林明高Ｗ
另外，甘美奧主場對巴希亞，甘美奧巴西國腳艾華頓索拉斯喺美洲盃大放異彩，更獲多間歐洲豪門關注，不過今場未必趕得切上陣，若然缺少呢位速度快兼射術了得嘅箭頭，甘美奧鋒力肯定打折扣，捧入球細正路。（周四早上6時15分開賽）最後帕拉尼恩斯主場迎戰法林明高，帕軍有後防主力泰亞高希蘭奴倦勤，法林明高近5仗錄得4勝夠晒穩定，聯賽暫列第3有餘力兼顧盃賽，客勝穩陣。

（周四早上8時30分開賽）