首場熱身賽鬥珀斯光輝
曼聯季前熱身賽第一擊，周六晚將會作客鬥珀斯光輝。「紅魔」季前簽入嘅丹尼爾占士同雲比沙卡等新兵，今場有望首次上陣同魔迷見面，為博表現肯定會畀多幾成力，加上光輝身為上季澳職常規賽冠軍，火力亦有番咁上下，今仗隨時為球迷獻上入球騷，中位數3.5球入球大咪錯過。
（Now 640周六晚7時直播）
「紅魔」上季4大皆空，仲痛失歐聯資格，經歷令人失望嘅一季，尤其防線表現欠穩，成為英超Big6失球數最多嘅球隊，新季好大機會面臨大變革。陣中多位主力季前會否繼續留隊，成為各界關注嘅焦點，除咗以天價回流嘅法國中場保羅普巴，一直盛傳想另覓東家之外，比利時前鋒盧卡古亦蠢蠢欲動想轉會，兩位有離心球星今次都有隨隊出征，領隊蘇斯克查肯定努力游說佢哋留隊。
新兵登場值得留意
不過蘇斯克查深知「紅魔」嘅未來屬於後生仔，今場季前熱身賽嘅主角應該都會屬於一班小將，睇番曼聯季前至今買入嘅新兵，丹尼爾占士同雲比沙卡都屬於英倫本土新晉，其中後者上季已經喺英超為水晶宮嶄露頭角，表現有板有眼，加上格連活特同安祖高美斯等青訓新仔，絕對值得一班「魔迷」期待。
另一邊廂，珀斯光輝上季雖然同季後賽總冠軍失諸交臂，不過作為澳職常規賽冠軍，整體質素絕對有保證，尤其常規賽轟入56球，係聯賽火力最猛嘅球隊，今場越級挑戰英超勁旅曼聯，冇贏波壓力反而有助球隊發揮，寧願搶攻入多幾球贈興，一於吼實入球大。
