國冠盃北美站聽朝揭開戰幔，由費倫天拿打頭陣出戰瓜達拉哈拉。「紫百合」有新班主上台，主帥蒙迪拿為保烏紗唔敢hea踢，必藉國冠盃爭取高層信任，撞正對親歐洲球隊例腳軟嘅瓜達拉哈拉，直取讓球主勝。（myTV Super 周三早上9時直播）

費倫今次係頂替羅馬參加國冠盃，今年4月先回巢執教嘅「飛機仔」蒙迪拿，因季尾戰績曳爆備受抨擊，咁啱今夏有新美國班主科米素入主，正所謂新人事、新作風，如果戰績繼續唔掂，佢都話唔排除會換帥，「飛機仔」唔想被炒就要醒醒定定，要認真應付國冠盃。費倫雖然冇乜添兵，費達歷高基艾沙因早前出戰U21歐國盃而未必趕及披甲，但陣中仍有基奧雲尼施蒙尼、米拿拉斯等壓陣，戰鬥力唔曳。

瓜達拉哈拉對歐洲隊例腳軟
昔日墨西哥班霸瓜達拉哈拉，近年喺墨超已今非昔比，上季首、次階段均位處中下游，令人失望，近6次熱身賽面對歐洲球隊，只得1勝1和4負，就算今場喺美國比賽、有半個主場之利亦靠唔住。何況「紫百合」喺近4場國冠盃，法定時間取得2勝1和1負，包括贏過巴塞隆拿及車路士，遇弱可大勝搶頭彩，讓球主勝捧得過。