朗尼孭飛強攻阿特蘭大聯
周一凌晨美職東岸大戰，阿特蘭大聯將會主場迎戰華盛頓聯隊。阿特蘭大聯前鋒祖斯夫馬天尼斯腳風順到冇朋友，另外有英格蘭前鋒朗尼壓陣嘅華盛頓聯隊，為挑戰東岸1哥位置仲要繼續搶分，預計今場係鬥攻格局，入球大值博。

（myTV Gold 301、Now 638、有線614及654台周一凌晨4時直播）

祖斯夫馬天尼斯上季打破美職常規賽入球紀錄，眾望所歸成為美職最有價值球員，今季呢位委內瑞拉射手托弗狀態依舊，聯賽至今為阿特蘭大聯轟入15球，包括上仗個人梅開二度，帶領球隊以5比0大挫侯斯頓戴拿模。計埋呢場，祖斯夫馬天尼斯自踢完美洲盃歸隊之後，已經連續4場有士哥，火力全開，今場有望延續超強攻力。

重拾佳態超晒班
另一邊廂，朗尼今季都已經為華盛頓聯隊射入11球，成為球隊首席射手之餘，仲係佢哋進攻嘅核心人物，上仗面對FC辛辛那提，呢位英格蘭前鋒接應長傳，單刀扭過兩名敵軍後衞之後施射得手，頗有巔峰時期喺英超大殺四方嘅影子，實力明顯超班仲有貨賣，加上得力助手保羅阿利奧拿踢完太公波後已經歸隊，華盛頓聯隊攻力有明顯加強，今場有本錢同阿特蘭大聯演對攻戰，入球大咪錯過。