今季英超进行咗接近一半，睇番依家英超积分榜嘅形势，冠军相信都会係传统劲旅之争，会唔会好似上季畀队李斯特城之类嘅奇兵弹出？我谂机会真係好微。不过都唔好睇小一啲中下游嘅球队，事关佢哋嘅表现，间接影响到前列嗰几队争标机会！
今日想同大家讲讲般尼茅夫呢队波，佢哋暂时排喺联赛榜嘅第12位，成绩中规中矩，不过论表现就真係令人眼前一亮，好似今季作客阿仙奴场波，比数虽然係输1比3，但般尼茅夫全场能够同对方互有攻守，而且一支中下游队伍可以喺控球比率上同阿仙奴不相伯仲，坦白讲，英超真係冇几多队波可以做得到。
当然不得不提今季喺主场落后两球嘅劣势下，反胜利物浦4比3一役，可以话係「樱桃」今季代表作，亦证明佢哋绝对有能力令任何一队争标球队失分。上场联赛佢哋虽然作客输畀车路士0比3，但睇番全场嘅统计数字，般尼茅夫不论係控球比率、传球次数同传球成功率，甚至比主队车路士更优胜，证明领队艾迪侯域嗰套控球在脚，主张地面组织嘅打法非常有效。
般尼茅夫现时所欠缺嘅，係一名具分量嘅射手，导致有时未能做到「一剑封喉」，如果艾迪侯域喺嚟紧转会窗重开对症下药，成绩一定可以比依家更加好。
