今晚欧联外围赛附加赛次回合，有德国球队慕逊加柏主场迎战瑞士「3哥」年青人。由于慕逊加柏首回合赢3比1兼手执3个作客入球，年青人若然想晋级，今场必须净胜3粒先有价讲，唯一方法就係疯狂抢攻，但慕逊加柏最叻打反击，今仗势必合演入球骚，入球大细3.5球，大盘有2倍分头绝对捧得过。

（有线63台周四凌晨2时45分直播）

如果有睇首回合场波嘅球迷，都有留意先失波嘅年青人，下半场倾力反扑一度追成1比1，嗰段时间可谓势兇夹狼，前线嘅贺拉奥、久保裕也等甚至有机会攻入反先士哥，不过踢波嘅嘢你入唔到波，转个头就畀慕逊加柏3分钟内连省2粒，最终喺主场输1比3坚唔抵。

以现时形势，因为慕逊加柏领先2粒兼揸住3个作客入球，年青人今仗赢2比0都会因作客入球较少而出局，换句话讲即係坐底要净胜3球，所以今仗冇得谂咁多，一定攻咗先讲，日前佢哋喺联赛对洛桑大炒7比2，攻力之强不容小觑。

不过慕逊加柏点秤都高一筹，依家处于领先优势兼有主场之利，必定睇住嚟食，以拉菲尔基达奴、史甸度为首嘅中前场反击厉害，首回合安达夏恩后备入替第一脚射门即入波，都係靠突击。年青人今仗一开波要谷前焗攻，随时暴露更多空位畀慕逊加柏打反击，实多波入，大盘咪错过。