智利德國大晒冷!
文:蘇斯黑柴

經驗Vs速度爭霸戰
洲際國家盃今晚上演王者戰，智利同德國喺俄羅斯聖彼德斯堡決戰。唔好諗住決賽雙方踢法會保守，德軍近期攻強守弱，希望用本身強項爭盃；智利平均年齡偏大，連戰兵疲亦唔想踢加時，兩軍都有搶攻理由。何況洲際國家盃唔同世盃或歐洲、美洲國家盃呢啲大賽，球隊心態輕鬆得多，歷屆決賽入球數字都偏高，大細中位數2.5球嘅大盤，有2.02倍值得推介！

（LeSports HK應用程式周一凌晨2時直播）
智利倚重「A山」搵食
決賽雙雄喺分組賽時已經交過手，當時1比1未分高下。今場係經驗同速度嘅對決，平均年齡達29歲嘅智利，主力中後場維達爾、馬些路戴亞斯、柏度靴南迪斯、干沙路查拉同包爾斯亞都年過30，經過4強同葡萄牙激戰120分鐘後，能否及時回氣係一大關鍵，今場自然唔希望要再次加時苦戰，預期會倚重由「A山」阿歷斯山齊士領軍嘅鋒線，務求法定時間內爭取入波砌低「日耳曼兵團」。

德國今次派出大量年輕球員應戰，分組賽表現麻麻，直至4強遇上墨西哥至踢出精彩一仗，攻擊手史甸度、迪姆華拿同哥列斯卡輪流爆發，前線火力全開，不過防線依然畀唔到人信心，上仗墨西哥前線對德國製造到嘅麻煩絕對唔少。

德軍防線欠穩易失波
德軍近期重攻輕守，睇番近7仗國際賽雖然有5勝2和唔曳成績，但當中只有對超級魚腩聖馬力諾一仗可保清白之身，其餘比賽都有失波，即使弱旅如阿塞拜疆、丹麥同澳洲，都可以喺德軍身上取得入球，今場再戰智利相信亦難保不失。睇番過去9屆洲際國家盃，有6屆決賽總入球達3球或以上，包括近3屆巴西3連冠，呢項賽事決賽向來唔保守，黑柴撐大盤。