哥斯達黎加旺細沒法擋
文:法達斯維

美洲金盃周六早上喺美國揭開序幕，率先上演A組首輪兩場賽事，最矚目必定係洪都拉斯硬撼爭標分子哥斯達黎加。哥斯達黎加續以祖爾甘保為首嘅2014年世盃班底，爭盃野心路人皆見，但對住同組最強嘅洪都拉斯，為免「聲大大冇貨賣」，勢必打穩陣波，加上雙方近年碰頭「交投淡靜」，捧中位數2.5球嘅入球細為妙。

（周六早上9時開賽，馬會網上文字直播）
哥斯達黎加堅重視今屆美洲金盃，除咗皇馬門神基羅拿華斯獲得免役之外，祖爾甘保、拜仁雷斯、莊尼阿哥斯達等協助球隊殺入2014年世盃8強嘅功臣皆有入選，明顯想爭冠軍。洪都拉斯以土炮為主，實力差少少，不過兩軍近8次交手，哥軍贏得1場咁大把，而且全部總入球都唔過3粒，為免首仗有乜閃失，預計唔敢輕敵，加上哥軍擅於穩守突擊，今仗唔慌多波入，捧2.5球嘅細盤最穩陣。

加拿大讓波捧法屬圭亞那
同組賽事兼揭幕戰，由法屬圭亞那火併加拿大。法屬圭亞那雖然首度參賽，不過由於佢哋唔屬於國際足協成員國，令前法國國腳馬隆達不受球員踢多過1支國家隊嘅限制，可以「轉籍」投效，呢位老將曾協助法國喺2006年世盃獲得亞軍，經驗老到，面對近7仗美洲金盃未贏過嘅加拿大，法屬圭亞那隨時有驚喜，受讓之下必捧讓球主勝。
（周六早上7時開賽）