紅鑽博反彈大起天鵝
文:法達斯維

唔贏即炒主帥柏度域
周日黃昏波有日職獨腳戲，由浦和紅鑽主場迎戰包尾大幡新潟天鵝。紅鑽上周中補賽慘敗，盛傳主帥柏度域今仗贏唔到即炒魷，以射手興梠慎三為首嘅鋒線火力強勁，不過主力守將遠藤航今仗要坐波監，防線存隱憂，隨時以攻代守，斯維覺得轉捧有2.05倍、中位數3.5球嘅大盤更划算。

（有線64台周日下午5時30分直播）
興梠慎三主場火力猛
紅鑽上季臨尾香屈居總亞軍，雖然今季成功殺入亞冠8強，但於聯賽表現飄忽，上周中補賽作客更以1比4大敗畀川崎前鋒，依家只位列中游，賽後有球迷嬲到堵塞紅鑽嘅隊巴，主帥柏度域焗住同粉絲直接對話，拍晒心口話會贏聯賽同亞冠盃錦標，講到咁盡一定唔會揸流攤，何況外邊一直傳緊佢連天鵝都贏唔到嘅話，即刻要執包袱。事實上，以興梠慎三、武藤雄樹、拿費爾達施華組成嘅鋒線火力強勁，現以12球位列射手榜1哥嘅興梠慎三，有10球係喺主場取得，難怪紅鑽今季8仗聯賽主場轟入26球，成為主場入波最多嘅球隊，即使李忠成跛咗都唔驚。

紅鑽守將遠藤航停賽
另一邊廂，新潟天鵝今季戰績差強人意，唔單止排緊包尾，單計9仗聯賽作客輸咗6仗，兼且失咗18粒，造訪火力強勁嘅紅鑽好難全身而退。不過紅鑽過於着重進攻，令後防漏洞百出踢咗17仗聯賽就狂失29球，上仗慘敗畀川崎前鋒，仲有主力守將遠藤航做埋「紅牌阿姑」，今仗要坐波監，但柏度域為保帥位已無退路，隨時以攻代守炮轟天鵝，預計會勁多波入，主勝得1.23倍冇肉食，倒不如轉玩3.5球嘅大盤。