意俄鬥縮 吼半場和
文:法達斯維

B組首輪初段睇定先
今晚女子歐國盃B組首輪開打，頭場由意大利女足於荷蘭鹿特丹出戰俄羅斯女足。意大利女足秉承意國男足穩中求勝嘅傳統，於上屆女子歐國盃3仗分組賽半場皆與對手互交白卷，證明佢哋唔會輕舉妄動，況且俄羅斯實力麻麻，今仗面對強隊亦唔敢冒進，預計初段會陷於膠着，一於捧半場和。

（奇妙電視77台及有線61、64、201及203台周二凌晨零時直播）
世界排名18位嘅意大利女足，雖屬女子歐國盃常客，但自從1997年奪得亞軍之後，近4屆頂盡殺入8強，唔算係一級勁旅。不過有一點同意大利男子國家隊一樣，意大利女足踢法亦注重防守，喺今屆外圍賽8仗轟入26球，鋒力遠遜德國女足、挪威女足或英格蘭女足等傳統勁旅，一旦先失波就會好被動，因此意大利女足經常穩陣行先，單計上屆3仗分組賽，意軍都喺上半場同對手踢成0比0，最終累積4分以次名出線，今次隨時照辦煮碗。

另一邊廂，俄羅斯女足對上5屆有4次進身決賽周，不過當中12仗分組賽未贏過，4次皆於分組賽被淘汰，僅屬陪跑分子。俄羅斯女足於2009年分組賽曾經與意大利女足同組，當時俄羅斯女足雖然輸0比2，但上半場亦能夠守和0比0，今屆再度撞到正，自知實力麻麻嘅俄羅斯女足預料會死守博1分，半場和好路。

大熱德國食住瑞典
同組尾場賽事，冠軍大熱門德國女足於荷蘭布雷達硬撼瑞典女足。德國女足近年打遍歐洲無敵手，對上6屆女子歐國盃皆捧盃而回，為爭取成為史無前例嘅7連霸，首仗必想打響頭炮唔會hea踢，加上對上7次國際賽鬥瑞典女足贏足6次，明顯食住對手，主勝有買趁早。
（有線61、64、201及203台周二凌晨2時45分直播）