心急抢W有前冇后
英超进入最后两轮，排第6嘅曼联能否取得欧联入场券，今晚对包尾兼降咗班嘅哈特斯菲尔德影响重大。曼联虽然求胜心切，但近日防线甩漏之多令人惨不忍睹，连一向最稳健嘅迪基亚都出晒丑，与其赢两粒先开到上盘，倒不如博中位数2.5/3球大盘更实际。
（Now 622周日晚9时直播）
曼联现时落后第4嘅车路士3分兼8个得失球，形势上可谓相当被动，唯一庆幸嘅剩番两场算易踢，煞科战对尾三嘅卡迪夫城，若前列球队失分，曼联仲有机会争入前四。
曼联近况之差相信唔使点多讲，乐比最想指出嘅係防线嘅漏洞，曼联已经连续13场赛事失波，係1970年以来最差嘅纪录。除咗个别球员质素所限，领队苏斯克查嘅布防亦好有问题，之前对巴塞隆拿嘅「一字联防」及「垂直防线」，已成为球迷嘅笑柄，近几仗亦唔见有太大改善，最惨係连迪基亚嘅信心都受到影响，上仗对车仔再犯低级错误，有球迷甚至要求佢唔好再担任正选，不过苏斯克查却仍对佢投以信心一票。
当然，如果比起其他球员，迪基亚仍算功可抵过的，防线上艾历拜利已提早收咧，菲尔锺斯、基斯史摩宁都有伤上阵成疑，预计中坚将由域陀连迪路夫及马高斯卢祖携手担任，想终止连续失球纪录似乎有难度。
哈特斯菲尔德唔刻意守
另一边厢哈特斯菲尔德情况亦恶劣，季中改由施维特担任领队后不但未有起色，表现似乎仲差过华拿嗰阵。哈仔过去23场联赛仅得1胜1和，输波已输到麻木，自正式宣布降班后，过去4场败仗失咗15球，睇嚟班球员已放开怀抱，唔会刻意死守，但求踢场好波送畀球迷，喺呢个心理状态下，捧大盘相信係最佳选择。