默郡打吡睇定嚟踢
今晚英超尾场上演默西赛德郡打吡，「1哥」利物浦作客硬撼死敌「拖肥糖」爱华顿。红军畀曼城愈追愈近，最弊係王牌穆罕默德沙拿脚风唔顺，罗拔图法明奴亦上阵成疑，火力大减下，预计今仗初段会大打稳阵波，加上近年造访葛迪逊公园球场例开半场和，值得再追。
（Now 621周一凌晨零时15分直播）
未计今轮赛事，利物浦只领先「2哥」曼城1分，榜首位置绝对唔多稳阵。红军近6仗入10球，但单係上周中快车期对屈福特狂派5蛋，即係话其馀5仗只入5粒，当中有2仗食白果，呢点正係红军战绩下滑嘅主因，而王牌穆罕默德沙拿呢6场入得1球咁大把，状态低沉冇晒货卖。另一射手罗拔图法明奴在上周「双红会」伤出，主帅高普话佢已进行跑步训练，不过未肯定今仗出唔出得，若然利物浦今仗只能靠沙迪奥文尼数胡，攻击力遭受大幅削弱，作客就更加唔敢乱攻。
红军4访葛迪逊
半场全和
另一边厢，佔主场之利嘅爱华顿在上周中快车大胜卡迪夫城3比0，终于走出3连败困局，而且打吡前夕大胜一场，肯定有助提升士气。中场基菲尔施古臣上仗个人省入两粒，今季喺联赛已累积11球进帐，连同右闸史密斯高文于上仗复出，爱华顿阵容更加完整。睇番首循环交手，「拖肥糖」只係因门神比克福特迟补时犯错导致输0比1，呢位门神至今仍耿耿于怀，吸取嗰次教训后，今战必定步步为营。最重要係红军近4次联赛造访爱华顿嘅葛迪逊公园球场，结果全部开出半场和，咁好路一于追多铺！