C朗做惯床单剋星
今晚续演欧联16强首回合，重头戏梗係马德里体育会主场硬撼祖云达斯。马体会近况跌Watt，相反祖记王牌基斯坦奴朗拿度（C朗）唔单止弗到漏油，佢仲係「床单剋星」，加上呢支意甲班霸近2届出战16强坚醒神，开平手盘祖记真係坐和望赢。
（Now 644、有线662及602台周四凌晨4时直播）
自2011-12年度球季开始，祖记连续7季于意甲封王，赢到冇晒对手，因此已剑指欧联，并喺2015及2017年两度杀入决赛，可惜输畀巴塞及皇马。今季决定重金签入年纪唔轻嘅C朗，正正係睇中呢位近5届4度助皇马勇夺欧联嘅射手斗心爆棚，佢加盟后喺各项赛事入咗21粒，兼交出12次助攻，合共炮製咗33个入波，佔祖记总入球（64球）超过一半，证明呢把锋利嘅刀仲未生锈。
翻查纪录，曾效力皇马9季嘅C朗，以往同马体会交手过31次，取得15胜8和8负，单计欧联淘汰赛，6次交手亦有4球进帐，全部最终均能淘汰马体会，包括2次决赛封王添，而佢个人更轰入22粒，係仅次于死对头美斯，成为现役球员中入「床单兵团」波第2多嘅球员，简直係「床单剋星」。
马体会兵员调度问题多
一向硬淨到晕嘅马体会，由于箭头迪亚高哥斯达伤咗好耐，于是喺冬窗从车路士借入「黑仔达」艾华路莫拉达，犹如将黑气传埋畀「床单兵团」，佢加盟头2场联赛即输晒，去到上仗先险胜华历简奴1粒，而且佢同王牌基沙文默契未足，虽然有传「迪哥」已经复操，但唔慌有态，连同后衞卢卡斯靴南迪斯扭伤韧带，实在问题多多。况且祖记近2届16强共4场比赛，取得3胜1和佳绩，今场有力反客为主，仲开平手盘咁笋，有捧趁早。