防线斗残好难唔失波
今晚欧联16强首回合上演超强戏码，两支5届冠军利物浦、拜仁慕尼黑于晏菲路球场交锋。红军今场后防天残地缺，为打响头炮随时以攻代守；拜仁歇冬后场场比赛有失波，后防亦唔稳阵，今场首选中位数2.5球入球大。
（Now 643、有线616及656台周三凌晨4时直播）
利物浦上届决赛1比3不敌皇家马德里屈居亚军，睇番晋级过程，佢哋喺16强、8强及4强首回合，分别以3球或以上差距击败波图、曼城及罗马，深明「好嘅开始係成功嘅一半」呢个大道理，加上佢哋今届分组赛主场全胜、作客全败，必藉主场之利希望打响头炮。
双方同样攻优于守
不过红军今场有多名后防主力缺阵，包括荷兰中坚华基尔云迪积克停赛，洛夫云、祖高美斯亦未伤愈，连可以串演中坚嘅法宾奴泰华利斯赛前都话肌肉拉伤上阵成疑，或者要搵啱啱伤愈复出嘅阿历山大阿诺特移入中路，天残地缺好难唔失波，好彩佢哋进攻火力向来有保证，除上季喺欧联加埋入咗30球嘅「进攻三叉戟」，今季加入梳顿沙基利后更如虎添翼，红军近11场主场豪取10胜1和，合共轰入32球，平均每场接近入3球，为掩盖后防弱点料以攻代守。
拜仁今季表现飘忽，门神纽亚、两大中坚晓姆斯及谢路美保定不断受伤患困扰，状态严重下滑，歇冬后联赛连盃赛6场都有失波，合共失10球，包括上场对奥格斯堡开波13秒闪电失守，集中力严重不足；不过佢哋同红军一样前线交到功课，罗拔利云度夫斯基今届欧联入咗8球，现时领先射手榜，法国翼锋京士利高文上场联赛个人梅开二度，配合歇冬后喺各项赛事分别攻入3球嘅基拿比及哥列斯卡，有本钱同红军斗攻，中位数2.5球大盘好抵玩。