小将抢缰轰基罗纳
皇马陪你食晚饭！今晚西甲头场咁啱係食晚饭时间，难得有「银河舰队」皇马登场，喺主场迎战沉到爆嘅基罗纳。皇马箭头宾施马虽有伤在身，但云尼斯奥斯祖利亚、马高阿辛斯奥等小将表现抢缰，遇上6连败嘅基罗纳，係呢班生牯仔表演嘅好时机，半场主胜有买趁早。
（Now 632周日晚7时直播）
皇马近期顺到冇朋友，上周作客马体会出乎人意轻取3比1，一改近年联赛遇同市死敌吃尽苦头嘅惨况，之后喺周中欧联16强首回合又赢阿积士2比1，近8仗豪取7胜1和，重拾佳态嘅箭头宾施马，更当选上月皇马最佳球员。虽然呢位射手喺欧联受伤，今仗上阵成疑，好彩云尼斯奥斯祖利亚、马高阿辛斯奥等生牯仔表现突出，前者有「新尼马」之称，经常喺左路搞搞震坚有威胁，佢喺各项赛事已交出8次助攻，而马高阿辛斯奥上仗入替宾施马即入波，非常饿波，连同加里夫巴利，火力全开。
基罗纳惯由头输到尾
讲到状态最曳嘅西甲球队，非基罗纳莫属，唔单止近6仗输晒，自12月头西盃击败艾拉维斯之后，连续13场未赢过，而且近5仗上半场就落后，由头输到尾曳爆，除咗前锋史杜安尼受伤外，后衞贝拿度荷西亦要停赛，更加冇还手之力。相反，皇马近5仗联赛有4次喺上半场领先，今仗强势出击速食对手，半场主胜咪走宝。